Film : Mysterious Island Year : 1961
சாகச திரைப்படங்களின் மீதான எனது தாகம் சின்ன வயதில் தொடங்கியது.புதையல், தனித்துவிடப்பட்ட மர்ம தீவுகள், வினோதமாக மிருகங்கள், அங்கிருந்து தப்பிக்க திட்டங்கள் போடும் மனிதர்கள் என பலத்தரப்பட்ட அம்சங்கள் நிறைந்த திரைப்படங்களை, இயக்குனர் யார், நடிகர்கள் யாவர் என்று எதுவுமே தெரியாது பார்த்த அனுபவங்கள் ஏராளம். அத்தனையும் சுவாரஸ்யமானவை.இன்றளவும் மனதோரம் மகிழ்ச்சியை தருபவை.அதனால்தான் என்னவோ தெரியவில்லை, நாவல்கள், சிறுக்கதைகள் என்று வாசிக்கும் சமச்சாரங்களும் சாகசங்கள் அதிகம் உள்ளவையாகவே மாறிப்போனது.
இப்படி படம் முழுவதும் சிறப்பம்சங்கள்.நெஞ்சை அள்ளும் வண்ணம் Wilkie Cooper - இன் ஒளிப்பதிவோடு ஒவ்வொன்றும் அழகாகவும் பிரமிப்பூட்டும் விதத்தில் எடுக்கப்பட்டுள்ளது.. அதற்கு இன்னும் ஒரு கூடுதல் வலுவாக நம் எல்லோருக்கும் அறிமுகமாக பெர்னார்ட் ஹெர்மனின் பின்னனி இசை.மனிதர் எப்படிதான் சஸ்பென்ஸ், ஆக்சன், மர்மம், ஃபேமிலி என்று இத்தனை வகை சினிமாக்களிலும் சிறப்பாக செய்கிறாரோ தெரியவில்லை.சரியா முதல் காட்சி தொடங்கியது முதல் வரும் அந்த படு வேகமான இசை, படத்தை மேற்க்கொண்டு பார்க்க வேண்டிய தீவிரத்தை வழங்கிவிடுகிறது.
======================================================================
Country : United States Rating : PG
Director : Cy Endfield
Writers : Jules Verne (Novel), Screenplay : John Prebble, Daniel B. Ullman, Crane Wilbur
Stars : Michael Craig, Joan Greenwood and Michael Callan
------------------------------------------------------------------------------------------------------------------------------------------------
சில ராட்சத சண்டை காட்சிகள், பெண் கவர்ச்சி உடைகள் என இருப்பதால் 10 வயதுக்கு குறைவானவர்கள் பெற்றோர்களுடன் பார்ப்பது நலம்
------------------------------------------------------------------------------------------------------------------------------------------------
பிரபல எழுத்தாளர் டேனியல் டெஃபோவ் அவர்களின் கைவண்ணத்தில் மலர்ந்த ரோபின்சன் குருசோவ் நாவலை பற்றி ஏற்கனவே காஸ்ட் எவே திரைப்பார்வையில் சொல்லியிருந்தேன்.இதுவரை படித்த புதினங்களில் மனதுக்கு நெருக்கமான ஒன்று.அதற்கு பிரதான காரணமும் சாகசங்கள்தான். அந்த கதை கொடுத்த தாக்கத்தில் இணையத்தில் தேடிய போது, மிஸ்டிரி ஐலண்ட் என்னும் Jules Verne என்பவர் எழுதிய நாவலும் அதனது தழுவலில் அதே தலைப்பில் வந்த ஆங்கில திரைப்படத்தை அறிய நேரிட்டது.கதைச்சுருக்கம் கொடுத்த அதே ஆவலோடு உடனே தரவிறக்கம் செய்து பார்த்த போதுதான் மனம் நிம்மதி அடைந்தது.
==========================================================================
கிளர்ந்தெளுகின்ற கடல் கொந்தளிப்பை காட்டிப்படியே கிரடிட் கார்டு ஓட, தீவிர இசையோடே அழைத்துச் செல்கிறது திரைப்படம்.
கதை நகரும் ஆண்டு 1885.அது அமெரிக்க நாட்டு சிறைச்சாலை, சுற்றியும் புகை, வெடிகுண்டுகளின் சத்தங்கள் நிறைந்த புயலில் போர் நிகழ்கிறது.முன்னமே போட்டு வைத்த திட்டத்தோடு, போரில் கைது செய்யப்பட்ட ராணுவர்கள் சிலர் தப்பிக்க ஆயுத்தமாகின்றனர்.கேட்ப்பார் அற்று கிடக்கும் பெரிய பலூனில் தப்பித்திட வேண்டும் என்பதே அவர்களது திட்டம்.சுமார் நான்கு பேர்கள் கொண்ட குழுவுக்கு தலைமை தாங்குகிறார் சைரஸ் ஹார்டிங்..காவலர்களுடனும் புயலுக்கு இடையிலான வலுவான போராட்டத்துக்கு பிறகு, வெற்றிக்கரமாக தப்பிக்கின்றனர்.
ஒருவருக்கு ஒருவர் பெரியளவில் அறிமுகமில்லாத அந்த ஐவரும் பலூனில் ஏற்பட்ட கோளாராலும் பேய்ப் போன்ற புயலாலும், ஆள் நடமாட்டமே இல்லாத தனித்தீவில் தனித்து விடப்படுகின்றனர்.வரைப்படமும் இல்லை..எந்த வித யூகிப்பும் இல்லை..எங்கே இருக்கிறோம் என்று தெரியாது அலைகின்றனர்.உண்மையை சொல்ல வேண்டுமெனில் தீவுக்குள் அவர்கள் கொடூரமான ராட்சத அபாயங்களுக்குள் சிறை வைக்கப்படுகின்றனர்.ஆம்..பல கொடிய மிருகங்கள் வாழும் தீவது.பற்றாதக் குறைக்கு எரிமலைகள் வேறு.
உணவு, ஆயுதங்கள், போதுமான தேவைகள் என்று யாதும் அற்ற அந்த மர்மத்தீவில் அகப்பட்ட அந்த ஐவரின் நிலைமை என்ன ? அவர்கள் தப்பித்தனரா ?? அல்லது விலங்குகளுக்கு பலியானார்களா ? என்பதை திரையில் பார்த்து அறிந்துக்கொள்வதே சிறந்த வழி.
==================================================================================
ஹாலிவுட் திரையுலக ஸ்பெஷல்/விஸுவல் எஃபெக்ட்ஸ் வரலாற்றில் Ray Harryhausen என்றுமே தவிர்க்க முடியாதவர்.பல புகழ்பெற்ற சாகச, ஃபேண்டசி திரைப்படங்களுக்கு பக்கப்பலமாக இருந்து பல மாய ஜால வித்தைகளை புகுத்திய ஒரு மேதை.இன்றைய தேதியில் நாம் ரசித்துப்பார்த்து ஆஹா, ஓஹோ என்று சொல்லி வியப்படையும் அனிமேஷன், 3டி, கிராஃபிக்ஸ் காட்சிகளை அன்றே தனது திறமையால் நம்ப மறுக்கின்ற வகையில் பயன்படுத்த முயற்சி செய்து வெற்றிக்கண்டவர்.Jason and the Argonauts (1963), Clash of the Titans (1981) போன்ற படங்களே அதற்கு மிக சிறந்த சாட்சி.
அக்கலைஞனின் கைத்தேர்ந்த விஸுவல் எஃபெக்ட்ஸ் ஆளுமைக்கு இன்னொரு உதாரணமாக மிஸ்டிரி ஐலண்ட் படத்தை குறிப்பிடலாம்.ஒட்டு மொத்தமாக ஒரு கும்பலயே விழுங்கிவுடும் உடல் அளவில் பழங்காலத்து பறவைகள், வண்டுக்கள், ஆளைக் கொல்லும் நண்டு என்று அதிசயங்களை விருந்தாக்கி பார்வையாளரை கட்டுக்குள் வைக்கிறார்.மேலும், தென் அமெரிக்காவில் வாழ்ந்து அழிந்ததாக கருதப்படும் Phorusrhacos என்ற இராட்சத பறவையை வடிவமைத்து திரைக்குள் கொண்டு வந்து மோதும் காட்சியில் ஆச்சரியபட வைக்கிறார்..அவ்வளவு பிரமாண்டம்.
ஸ்பெயின் நாட்டில் படம் பிடிக்கப்பட்ட இத்திரையில் Michael Craig, Joan Greenwood and Michael Callan ஆகியோர்கள் முக்கியமான கதாபாத்திரங்களில் நடிக்க, இயக்கிருப்பவர் Zulu (1964), Hell Drivers (1957), Zulu Dawn (1979) போன்ற படங்களை எடுத்த Cy Endfield (1914-1995) ஆவார்.நாவலின் அசலான கதையை வைத்துக்கொண்டு சில பெண் கதாபாத்திரங்கள், காட்சிகள் என சிலவற்றை கூடுதல் படுத்திட விறுவிறுப்பாக சுமார் ஒன்றைரை மணி நேரம் போவதை தெரியாது கொண்டு சென்ற இயக்குனருக்கும், படக்குழுவினருக்கும் நன்றிகள் பல சொல்ல வேண்டும்.
பொதுவாக ஹாலிவுட் சாகச, ஆக்சன் படங்களில் லோஜிக்கை பார்ப்பது பாறைக்குள் சிக்கித் தவிப்பதை போல.எவ்வளவுதான் சிந்தித்து பார்த்து ரசித்தாலும் அவர்கள் விரிக்கின்ற வலையில் போய் விழுவதென்பது அரிதான காரியம்.காரணம் அது இன்று தொடங்கியது அல்ல, எத்தனையோ வருடங்களுக்கு முன்பு வந்தவை.ஆரம்ப காலத்தில், நாவல்கள், சிறுக்கதைகள் என்றப்படியே தொடங்கிய இது, திரைப்படங்களில் தொற்றிவிட்டது..கற்பனைகளுக்கு எட்டாத கதைக்களங்களும், விறுவிறுப்புக்கு பஞ்சமில்லாத வகையில் காட்சியமைப்புகளும் என பலவற்றை காண்பித்து லாஜிக் ஓட்டைகள் எல்லாவற்றையுமே அடைத்துவிட முயற்சி செய்வார்கள்.அது பெரும்பாலான வயதினர்களும் ரசிக்கும் படி அமைந்துவிடுவதே அமெரிக்க சாகச, ஆக்சன் படங்களுக்கு மிக பெரிய பலம் என்று நினைக்கிறேன்.
அந்த வரிசையில் மிஸ்டரி ஐலண்டும் அடங்கும்..ஏன், எப்படி என்ற பல கேள்விகளை மறந்துவிட்டு இந்த படத்தை பார்த்தோமானால், ஒரு அழகான பொழுது போக்கு அம்சமாக உருவாகிவிடும்.. குழந்தைகளோடு பாருங்கள்.குறைகள் பல இருப்பினும் ஜாலியாக பார்த்து நன்றாக ரசிக்கலாம்.
IMDB : 6.8 / 10
MY RATING : 6.0 / 10
Mysterious Island : Fantasy Island
ஏதேனும் தவறாக குறிப்பிட்டிருந்தால் மன்னிப்பதோடு கருத்துக்கள் இருந்தால் தயவு செய்து கமெண்ட்ஸ் பாக்ஸில் குறிப்பிடவும்.மேலும், தங்களுக்கு பதிவுகள் பிடிக்குமெனின் ஓட்டளித்து ஊக்கமளியுங்கள். சிறந்த ஆதரவுகளே சிறப்பான படைப்புகளை உருவாக்கும் என்ற நம்பிக்கையில் மீண்டும் அடுத்த பதிவில் சந்திக்கலாம்..அதுவரை நன்றி மற்றும் வணக்கம்.
உங்கள் ஆதரோவோடு,
