The Howling (1981)

ஹாலிவுட்டில் ஹாரர் படங்களுக்கு பஞ்சமே இல்லை.புதுசு புதுசா எடுக்கிறேன் என்று சொல்லிவிட்டு அரைத்த மசாலாவையே திருப்பி திருப்பி தயாரிக்கிறது-ல மன்னர்கள்.அதிலும் இந்த டிராகுலா, ஓநாய் மனிதனாகும் கதையெல்லாம் சொல்லவே வேண்டாம்.இதெல்லாம் பார்த்து தாங்க முடியாது விமர்சகர்களும் பல படங்களை மாங்கு மாங்குனு குத்தி-கிட்டு இருந்தாலும் "நான் விடமாட்டேனு" இன்னமும் மௌசு குறையாது சக்கை போடு போட்டு கொண்டிருக்கிறது என்றால் ஆச்சரியம்தான்.அந்த வரிசையில் 1981-ம் ஆண்டில் வந்ததுதான் தெ ஹௌலிங்.ஹாலிவுட் பேந்தசி, சின்ன பிள்ளைகள் படங்கள் பார்த்து வருபவர்களுக்கு கொஞ்சமாவது அறிமுகமான பெயராக இயக்குனர் ஜோய் டாந்தே-வை சொல்லலாம் (படத்துல எனக்கு வேற யாரையும் தெரியாதுப்பா)..காரணம் இவர்தான் ஸ்பீல்பெர்க் தயாரித்த க்ரேம்லின்ஸ் படத்தை எடுத்த புண்ணியவான்..(இத நான் நொந்துப்போய் சொல்றேன்).இவர் எடுத்த ரொம்ப சீரியஸான படங்களில் இதுவும் ஒன்றாம்.இப்படம் Gary Brandner என்பவரால் 1977-ல் எழுதப்பட்ட நாவலை தழுவி வந்தது குறிப்பிடதக்கது.

காரேன் வைட், லாஸ் ஏஞ்சல்ஸில் செய்தி தொகுப்பாளராக பணி செய்து வருபவர்.எதிர்ப்பாரா விதத்தில் எடி என்ற சீரியல் கில்லரின் தொடர்பில் காரென் சிக்க, பின்னர் போலிஸாரால் சுட்டு கொல்லப்படுகிறான் எடி.சம்பவம் நடந்த அதிர்வில் காரனின் மூளை பாதிக்கிறது.இந்த சூழலில் சரிவர வேலையும் செய்ய இயலவில்லை..வேறென்ன? டாக்டர்தான்.அவரு "காலெனி" என்ற இடத்துக்கு டிரீட்மெண்டுக்கு அழைத்து வராரு.கூடவே காரெனின் கணவன்.அங்கு நிகழும் மர்மங்கள்,. ரகசியங்கள் இதுதான் மீதக்கதை..நம்மை கவருவதற்காகவே விறுவிறுப்பான திரைக்கதையில் பயணித்த படக்குழுவினர்களுக்கு நன்றிகள்.

படத்தின் பெரிய பலமாக விளங்குவது கிராப்பிக்ஸ்..அதுவும் வருவது கடைசி காட்சிகளில்தான்.மனிதன் ஓநாயாக மாறுவதை ரொம்பவும் தத்ரூபமாக எடுக்க டிரை பண்ணிருப்பதே வரவேற்கதக்கது.குறிப்பாக, கதையில் ஒரு கட்டத்தில் ஓநாயின் கையை தெர்ரி என்பவர் வெட்ட, அது துண்டித்து மீண்டும் புதுப்பிக்கும் காட்சி அருமை..இப்படியே சில காட்சிகள் ஓரளவு கவர்ந்ததை வைத்து படம் ஓக்கே என்ற முடிவுக்கு வரலாம்.

படம் விமர்சகர்களிடம் மொக்கை அடி வாங்கும் என்று தெரிந்தே சேர்த்தது போல் ஓரிரெண்டு "அல்வா" காட்சிகள்.அந்த காலத்தில் ரசிகர்களை முக்கியமாக இளைஞர்களை ஈர்க்கும் சாதனமாக, வசூலும் ஆவதற்கு நல்ல உதவியாக இருந்திருந்தாலும் இருந்திருக்கும்.அதில் "ஐட்டம்" சீன் ஒன்று போதே நாயகர்கள் ஓநாயாக மாறுவது அசத்தல்.ரொமான்ஸ் மூடில் இருக்கும் பார்வையாளர்களை சற்று அதிரவும் செய்யக்கூடியது .எல்லாவற்றையும் தாண்டி Pino Donaggio-வின் பின்னனி இசை.ஒரு அமெரிக்கன் படத்துக்கு இந்த இத்தாலிக்காரர்-தான் பெரிய ஆறுதல்-நா பாருங்களேன்.என்ன இருப்பினும், சமீப காலத்தில் பார்த்த ஹாரர் படங்களில் தெ ஹௌலிங் ஓரளவு நல்ல ஃபீலிங் கொடுத்ததை தவிர்க்க முடியவில்லை. கண்டிப்பாக ஓநாய் படங்களின் வரிசையில் சிறந்த இடத்தை கொடுக்கலாம்..பல சினிமாக்களில் கண்ட காட்சிகளே இதிலும் ஓடினாலும் அதனை கொஞ்சம் கூடுதல் கவனத்தோடு இசை, ஒளிப்பதிவு ஆகியவை கலந்து சுவாரஸ்யமாக தந்தது இயக்குனரின் வெற்றி.ஹாரர் நண்பர்கள் தவற விடவே கூடாத ஒரு கிளாசிக் படமாக இதை ரெக்கமண்ட் பண்றேன்.பாருங்க-ப்பா.

கொசுரு தகவல்: இந்த படம் கொடுத்த ஆறுதலில் அடுத்த பார்க்க போவது An American Werewolf In London (1981)..அதிலும் ஒருத்தன் ஓநாயா மாறுவானாம்..கதை படித்தேன்.பார்த்துட்டு பிடித்தால் வழக்கம் போல் மொக்க பதிவொன்று போடுறேன்.

An Education (2009) - பருவ காதலின் விளைவுகள்..

கடந்த சில ஆண்டுகளில் வெளிவந்த சிறந்த படங்களுல் ஒன்றாக கருதப்படும் என் எடுகேஷன் படத்தை பலரும் அறிந்திருக்க வாய்ப்புகள் உண்டு.சிலர் கண்டு ரசித்திருப்பார்கள்.சமீபத்தில் பார்த்து சிந்திக்க வைத்த படமிது,1960 ஆம் ஆண்டுகளில் பள்ளியில் பயின்றுவரும் 16 வயது மாணவிக்கும் நடுத்தர வயதிலான ஒருவருக்கும் இடையில் இருந்த உறவையும் ஏமாற்றங்களை பற்றியும் பேசும் திரையிது.

என் எடுகேஷன் - சிறந்த திரைப்படம், நடிப்பு மற்றும் திரைக்கதை ஆகிய பிரிவுகளில் ஆஸ்கர்களுக்கு பரிந்துரைக்கப்பட்ட, 2009 ஆம் ஆண்டு Carey Mulligan, Peter Sarsgaard, Emma Thompson, Dominic Cooper, Olivia Williams மற்றும் பலரது நடிப்பில், Lone Scherfig இயக்கத்தில் வெளிவந்த கமிங்க் ஒப் ஏஜ் காதல் சித்திரமாகும்.
ஜென்னி மெல்லொர் அழகானவள், நல்ல அறிவுத்திறனும் கடின உழைப்பும் கொண்ட 16  வயது பள்ளி மாணவி.தன் தந்தையின் ஆசைகள் படி ஒக்ஸ்ஃபோர் பல்கலைகழகத்தில் சேர்ந்து படிக்க வேண்டுமென்பதை லட்சியமாக, முழு நாட்டத்துடன் படித்துவருபவள்.பள்ளி முடிந்து ஒரு நாள், மழைநேர பொழுதில் டேவிட் கோல்ட்மன் என்பவரை தற்செயலாக சந்திக்க நேர்கிறது.டேவிட் - தவறான வழியில் பணத்தை ஈட்டுவதை பழக்கமாக கொண்டவன், ஏறக்குறைய ஜென்னியை விட இரண்டு மடங்கு அதிகமான வயதை கொண்ட யூத இனத்தை சேர்ந்தவன்..
தொடக்கத்தில் நட்பு என்ற முறையில் அறிமுகமாகும் உறவு வழக்கம் போல காதலை எட்டிப் பார்க்கிறது..போக போக ஜென்னி மற்றும் குடும்பத்தின் நம்பகத்தன்மைக்கு உட்பட்ட ஆளாகவும், ஜென்னியின் ஆசைகளை நிறைவேற்றி வைக்கும் காதலனாகவும், இக்கட்டான சந்தர்ப்பங்களில் துணைப்புரியும் நல்ல இதயம் கொண்ட மனிதனாகவும் காட்டிக்கொள்கிறான்.டேவிட்டுடனான உல்லாச உறவில் பரிட்சையில் தோல்வி அடைவதோடு படிப்பை உதறி தள்ளுகிறாள்..இதனை தொடர்ந்து..  ஜென்னியின் பெற்றோரும் டேவிட்டை திருமணம் புரிய சம்மதம் சொல்கின்றனர்.திருமண நாள்..அங்கு வெளிப்படும் உண்மைகளே மீத திரைக்காட்சிகள்.சுமார் ஒன்றரை மணி நேரம் ஓடும் படம், முடிந்தப்பின்னும் மனதோடு நல்ல உணர்வுகளை தரக்கூடியது.

பருவ வயது ஆசைகள் நிரம்பிய மனக்கட்டுப்பாட்டுகளை மீறிய முழுமையாக ஒருவரை பற்றி அறிந்துக்கொள்ளமால், அளவுக்கோளை தாண்டிய பாசமும் நம்பிக்கையும் கொண்ட பருவ வயது மாணவியாக 

அழகு பதுமையாக வரும் Carey Mulligan..இவரது நடிப்பீல் முதன் முதலாக பார்த்த படமிது.. மையக்கதையே இவரை சுற்றி நகர்வதால் படம் முழுக்க நம்மை வெகுவாக கவர்கிறார்.17 வயதை நெருங்கும் ஜென்னி மெல்லர் என்ற பாத்திரத்தில் வரும் கேரிக்கு இத்திரைப்படத்தின் பொழுது வயது 24 என்பது குறிப்பிடதக்கது.சிறந்த நடிப்புக்காக இவர் ஆஸ்கருக்கு பரிந்துரைக்க மேலும் ஒரு சிறப்பாகும்.  

படத்தில் மையக் கதாபாத்திரமான ஜென்னியை திரைக்காட்சிகளின் உள்ளே அழைத்து செல்லும் டேவிட் கொல்டுமன் கதாபாத்திரத்தில் Peter Sarsgaard..அநேகமாக இவரது நடிப்பில் பார்க்கும் 4 அல்லது 5 ஆவது படமென்று நினைக்கிறேன்.என்றும் இல்லாத அளவில் இவரது நடிப்பு என்னை அதிகமாகவே பாதித்துவிட்டது.காட்சிகள் ஒன்றன் பின் நகரவே கொஞ்சம் எரிச்சலையும் மூட்டுகிறார்.பொதுவாக பீரியட் படங்களின் மீது அதிகமான பிரியம் கொண்டவன்..அதற்கு மிக முக்கியமான காரணம் இந்த வகை அமைப்பில் படங்களில் இடம்பெறும் அழகுதான்.அந்த வரிசையில்..இந்த படமும் ஒன்றாகிவிட்டது.  

1960- ஆண்டுகளின் பழைய இங்கிலாந்தை கண் முன் வந்து நிறுத்துகிறது திரைப்படம்..பிரமாண்டமான, மிக பெரிய அளவில் கேமரா அசைவுகள், இயற்கை காட்சிகள் இல்லாவிட்டாலும் கதாபாத்திரங்களுடன் இணைந்தே ஒர் அழகான ஓவியமாக வலம் வருகிறது ஒளிப்பதிவு.இதனை சிறப்பான முறையில் கையாண்ட John de Borman கண்டிப்பாக பாராட்டதக்கவர்.தனது திரையுலகில் இன்னொரு சிறப்பான பணியை செய்திருக்கிறார். ப்ரான்ஸ் நாட்டில் இடம்பெரும் காட்சிகள் சில கணங்களே வந்தாலும் மனதிலே நிற்க்கின்றன.படத்தின் வெற்றிக்கு கலை இயக்குனர் Ben Smith-இன், (The Queen (2006) போன்ற படங்களில் பணிப்புரிந்தவர்) பங்கும் மிக அதிகம்.  

ஒளிப்பதிவு, எடிட்டிங், இசை என்று பல பிரிவுகள் ஒரு கதையை சிறந்த படமாக உருவாக்க மிக பெரிய உதவியாக இருந்தாலும் எந்த ஒரு படைப்பையும் முழுமையாக ரசிகர்கள் மட்டுமன்றி விமர்சக ரீதியிலும் காலங்கள் கடந்து மனதில் நிற்கச் செய்வது திரைக்கதைதான் என்பது எனது தனிப்பட்ட கருத்து..ஏனெனில் ஒரு சிம்பிளான கதையை கூட திரைக்காட்சிகளின் வழியே நல்ல படைப்பாக மாற்றலாம்.அந்த வகையில் இந்த படமும் ஒரு நல்ல உதாரணம்... இத்திரைப்படத்தின் திரைக்கதை எழுத்தாளரான Nick Hornby, ஒரு நாவல் மற்றும் கட்டுரை ஆசிரியரும் ஆவார்..சில பிரபலமான நாவல்களான High Fidelity, About a Boy ஆகியவை மூலம் பலரை கவர்ந்தவர் என்பதோடு, இந்த படத்துக்காக இவர் ஆஸ்கர் பரிந்துரை பெற்றது குறிப்பிடதக்கது. 

தற்போதைய சூழலில் மலேசியா மட்டுமன்றி உலகம் முழுவதும் பள்ளி பருவ காதல் என்பது அதிகமாகவே வளர்ந்துக்கொண்டு வருகிறது.இதனை காதல் என்று சொல்வதை விட பதின்ம வயதில் வரும் ஒரு இன கவர்ச்சி என்று கூறலாம்.இப்படி ஒரு இளம் வயதில் "காதல் அது இது" என்று சாதாரண இன கவர்ச்சியின் பால் ஈடுபட்டு தங்களது வாழ்க்கையே முடிந்துவிட்டதாக எண்ணி வருந்தும் சகோதர சகோதரிகள் நிறையவே.இதே சூழலை 60 ஆம் ஆண்டுகளில் இங்கிலாந்தில் வசித்த ஒரு மாணவியின் கதையாக்கி இதனால் ஏற்படும் விளைவுகளையும், அதிலிருந்து மீண்டு வர வேண்டிய அவசியத்தையும், மேலோட்டமாகவும் தெளிவாகவும் அதே நேரம் மென்மையாகவும் தரமான ஒரு பிஜி - 13 ரேட்டிங் பெற்ற படைப்பாக வழங்கிய படக்குழுவினருக்கு பல நன்றிகள்.கண்டிப்பாக பதின்ம வயதை தொடுபவர்கள் மற்றும் தன் வாழ்க்கையின் அடுத்த படியில் காலடி எடுத்து வைக்கும் இளம் வயதினர்கள் பார்க்க வேண்டிய படம்.

Though the latter part of the film may not appeal to all, An Education is a charming coming-of-age tale powered by the strength of relative newcomer Carey Mulligan's standout performance. - Rotten Tomotoes "94%"

இங்கிலாந்து படமான இது, உலகளவில் நல்ல வரவேற்பு பெற்றதோடு 7.5 மில்லியன் பட்ஜெட்டில் உலகம் முழுவதும் சுமார் 26 மில்லியனுக்கு மேல் வசூல் செய்தது குறிப்பிடதக்கது..மேலும், பல திரைப்பட விழாக்களில் பல பரிந்துரைகளோடு நிறைய விருதுகளை வென்றது இன்னொரு சிறப்பு.மொத்ததில், இந்த படம் எனக்கு பிடித்த கவர்ந்த திரைப்படங்களில் ஒன்றாகிவிட்டது.சமீப காலத்தில் பார்த்து ரசித்து சிந்திக்க வைத்த ஒரு படம்..நடிகர்களின் நடிப்புக்காகவே இன்னொரு முறை பார்க்கலாம்.

என் எடுகேஷன் - அனைவரும் கண்டிப்பாக பார்க்க வேண்டிய வாழ்க்கை  படம் + பாடம்/ 

==============================================================

 பின் குறிப்பு : உலக சினிமாவை தொடர்ந்து பார்த்து வருபவர்களுக்கு "கமிங்க் ஒஃப் ஏஜ்" என்ற வகையை பற்றி சொல்ல தேவையில்லை..திரையுலக வரலாற்றில் பல நல்ல படைப்புகளை கொடுத்த பிரிவு என்று சொன்னால் அது மிகையாகாது.குழந்தை பருவத்திலிருந்து பதின்மவயதை சந்திக்கும் தனிநபர்களின் வாழ்க்கை அவர்களிம் மனம், உடல் ரீதியில் ஏற்படும் மாற்றங்களை (பாலியல், கலவி) மையக்கருவாக கொண்டு எடுக்கபடும் படைப்புகள் கமிங்க் ஒஃப் ஏஜ் சினிமாவாக கருதப்படுகின்றன.60 ஆண்டுகளிலிருந்து உலகம் முழுவதும் இது போன்ற படங்கள் பெரிய அளவில் எடுக்கபட்டதோடு விமர்சகர்கள் மற்றும் ரசிகர்கள் மத்தியில் இன்றுவரை நல்ல வரவேற்ப்பு பெற்று வருவது சிறப்பு..அமெரிக்கா மட்டுமன்றி வேறு நாடுகளில் இதுப்போன்ற கதை அம்சங்களை கொண்டு தயாரிக்கப்படும் திரைப்படங்களை "டீன் மூவிஸ்" என்றும் அழைக்கபடுவது குறிப்பிடதக்கது. இந்த வகையில் வெளிவந்த சிறந்த படங்கள் சில : Stand By Me (1986), Girl Interrupted (1999), Closely Watched Trains (1966), Stealing Beauty (1996), 

மேற்ச்சொன்ன படங்களில் சென்ற வருட இடையில் பார்க்க கிடைத்த படம் Closely Watched Trains (1966)..கமிங் ஒஃப் ஏஜ் பிரிவில் வெளிவந்த செக் குடியரசு நாட்டில் எடுக்கபட்ட ஒரு மாஸ்டர்பீஸ் எனலாம்..இரயில் நிலையத்தில் புதிதாக வேலை கிடைத்து செல்லும் பதின்ம வயதான இளைஞன் பற்றியது..ஆஸ்கர் விருது பெற்ற படம்..பதிவாக எழுத நினைத்த படம்..சிறந்த உலக திரைப்படங்களை விரும்புவர்கள் கண்டிப்பாக பார்க்க வேண்டிய படைப்பு.    

==============================================================

மீண்டும் அடுத்த பதிவில் சந்திக்கலாம்.அதுவரை நன்றி மற்றும் வணக்கம்.உங்கள் ஆதரோவோடு,

Logan's Run (1976) : முப்பது வயதில் மரணம்...

பொதுவாகவே அறிவியல் சம்பந்தபட்ட திரைப்படங்களின் மீது எப்பொழுதுமே எனக்கு அதிகளவில் நாட்டமுண்டு.சிறிய வயதில் குடும்பத்தோடு மீண்டும் மீண்டும் பார்த்து ரசித்த ஜுராசிக் பார்க், பிரடேட்டர் போன்ற திரைப்படங்களே இதற்கு ஆணிவேறாக இருந்திருக்கும். அன்றைய நாட்களில் கதையே புரியாமல் பார்த்த இது போன்ற திரைப்படங்களே இன்று என்னுடைய ஓரளவு சினிமா ஆர்வத்திற்கு ஒரு தொடக்க புள்ளியாக இருந்திருக்க கூடும்.

சினிமா தொடங்கியதிலிருந்தே அறிவியல் புனை திரைப்படங்கள் வந்த வண்ணமே இருக்கிறது..எண்ணிலடங்கா கற்பனைகளாலும் பிரமாண்டமான திகைப்பூட்டும் காட்சியமைப்புகளாலும் மக்களை தங்களது வலைக்குள் சிக்கவைத்து வருகிறது..2001 ஒரு ஸ்பேஸ் ஒடிஸி தொடங்கி அவதார் போன்ற படைப்புகளை இதற்கு உதாரணமாக சொல்லலாம்.இது போன்ற திரைப்படங்களே இன்று உலகமெங்கும் வளர்ந்து வருகிற சினிமா தொழில்நுட்பத்திற்கு ஒரு மைல் கல்லாக விளங்குகிறது.டெர்மினட்டர், அவதார் போன்ற திரைப்படங்கள் இதையே திரும்ப திரும்ப நிருபித்துக்கொண்டும் வருகின்றன.

Logan's Run அல்லது லோகனின் ஓட்டம் 1976-ஆம் ஆண்டு மைக்கேல் ஆண்டர்சன் என்பவரின் இயக்கத்தில் மைக்கேல் யார்க், ஜென்னி மற்றும் ரிச்சர்ட் ஜோர்டான் ஆகியோரின் நடிப்பில் வெளியான ஹாலிவுட் அறிவியல் புனை திரைப்படமாகும்.வில்லியம் எஃப் நோலன் மற்றும் ஜார்ஜ் கிளேடன் ஜான்சன் என்ற எழுத்தாளர்களின் கைவண்ணத்தில் 1967 (அதே பெயரில்) வெளிவந்த நாவலை அடிப்படையாக கொண்ட இந்த திரைப்படம் இரண்டு ஆஸ்கர் விருதுகளுக்கு பரிந்துரைக்கபட்டதோடு அதில் சிறந்த Visual Effects- காக வென்றது குறிப்பிடதக்கதாகும்.

சரியாக 2274 - ஆம் வருடம்.முப்பது வயதை நெருங்கும் அனைவருமே இறக்க வேண்டிய கட்டாயம் அல்லது நிலை ஏற்படுகிறது.மக்கள் அனைவரும் வெளியுலகமே என்னவென்று தெரியாத நிலையில் அனைவரும் தாங்கள் வசிக்கும் நகரத்தின் உள்ளே சீல் வைக்கபடுகின்றன்ர்.மேலும் அவர்கள் இன்பமான வாழ்க்கையை வாழ்வதற்கு அரசாங்கம் எல்லா வசதிகளையும் செய்து தருகிறது.

முப்பது வயதை நெருங்கும் அனைவரும் Carousel என்ற இடத்திற்கு செல்ல வேண்டும் என்று கட்டளை அல்லது சட்டத்தை விதிக்கிறது (ஏன்..எதற்கு என்ற கேள்விகளுக்கு திரையில் பதிலைக் காணுங்கள்).இதை மறுத்து நகரத்தை விட்டு தப்பித்து செல்வதற்கு முன்படும் அனைவரையும் "Sandmen" என்று அழைக்கபடும் போலிஸ் அதிகாரிகளை கொண்டு தீர்த்தும் கட்டிவிடுகிறது. இதற்கிடையே திரைப்படத்தின் கதாநாயகனான மைக்கேல் யார்க், அதாவது..."லோகன்" சில காரணங்களினால் நகரத்தை விட்டு ஓடக்கூடிய இக்கட்டான சூழ்நிலை ஏற்படுகிறது.இவருடன் கதாநாயகியான ஜென்னி Agutter, அதாவது..."ஜெசிக்கா" இணைந்துக்கொள்ள, போலிஸும்  பின்னால் துரத்த.இவர்கள் இருவரும் தப்பித்தார்களா அல்லது பிடிபட்டார்களா அல்லது வெளிநகரில் காத்திருக்கும் தெளிவான உண்மையென்ன என்பதை பதிவிரக்கமோ அல்லது டிவிடியோ ஏதாவது இருந்தால் கட்டாயம் பாருங்கள்.(கதை சொன்ன விதம்..தாங்க இப்படி மோ..மோ...மோ...ச..ச..மா இருக்கு.படத்த பாருங்க பிடிக்க வாய்ப்புண்டு)

 70-ஆம் ஆண்டுகளில் வெளிவந்த படங்களில் மிகவும் அண்டெரேடட் செய்யப்பட்ட படைப்பாக லோகன்ஸ்-ரன் படத்தை சொல்லலாம்.வெளிவந்த புதிதில் விமர்சக, ரசிகர்கள் மத்தியில் வெற்றி பெறாததே அதற்கு மிக பெரிய காரணமாகவும் இருந்திருக்கலாம்.ஆனால், இன்று இந்த படம் ஓரளவு நல்ல வரவேற்பு பெற்று வருவதோடு ரீமேக்கும் செய்யபட இருக்கிறது.லோகன் என்ற கதைநாயகனாக நடித்த Michael York- அவருடைய நடிப்பை நான் இதற்கு முன்பு பார்த்ததுக்கூட இல்லை.கதைக்கு தேவையான நடிப்பை கட்சிதமாக வெளிபடுத்தியுள்ளார்.

இசையமைப்பாளரை பற்றி கண்டிப்பாக சொல்ல வேண்டும்.Chinatown-1974, Planet of the Apes-1968 போன்ற திரைப்படங்களின் இசையமைப்பாளரும் தெ ஒமன் என்ற ஹாரர் திரைப்படத்திற்க்காக ஆஸ்கர் விருது பெற்றவருமான Jerry Goldsmith, உலகளவில் எனக்கு மிகவும் பிடித்தமான இசையமைப்பாளர்களில் ஒருவர்.வழக்கம்போல் இவர் பின்னனி இசையில் சும்மா கலக்கி இருப்பார்.ஒரு வித்தியாசமான 70 ஆண்டு சைன்ஸ் ஃபிக்ஷன் படங்களையை பார்க்க நினைப்பவர்கள் இந்த லோகான்ஸ் ரன்னை பார்க்கலாம்..ஆக்சன், திரில்லர், ரொமான்ஸ் என்று அனைத்து வகையிலும் அமைந்த ஒரு பொழுது போக்கு அம்சம் இப்படம். 

 உங்கள் ஆதரோவோடு,

Yojimbo (1961) பாகம் இரண்டு

-----------------------------------------------------------------------------------------------------

யோஜிம்போ - ஒரு திரைக்காவியம் : பாகம் ஒன்று

-----------------------------------------------------------------------------------------------------

திரைக்கதையின் முழு வேகமே நடிகர்களின் நடிப்புதான் என்பதில் துளியும் சந்தேகம் இல்லை..அந்த வரிசையில் ஒவ்வொருவரும் தத்தம் கதாபாத்திரத்தில் தனித்து நிற்கின்றனர்.குறிப்பாக, ஹிரோவுக்கு ஒரே ஆதரவாக, நண்பராக வரும் Eijirō Tōno - வின் நடிப்பு அருமை..வாடிப்போன ஊரில் ஏன் வாழ்கிறோம் என்றுக்கூட தெரியாது வந்து கோஞ்சி என்ற கதாபாத்திரத்தில் வாழ்கிறார்.வெறுப்பு, விருப்பு அத்தனையும் எளிதாக அந்த முகத்தில் பேசுகிறது.படம் ஆரம்பித்ததும் இதில் வில்லன் யாரு என்ற கேள்வி வந்தது.காரணம், A Fistful of Dollars (1964) படத்தில் வில்லனாக Gian Maria Volonté நடித்து அசத்திருப்பார்..அந்த கதாபாத்திரம் இதில் எப்படியோ என்று நினைக்கும் பொழுது Tatsuya Nakadai, உனோசுகே என்ற கதாபாத்திரத்தில் வந்து மிரட்டுகிறார்.ஹீரோ, அவரைசுற்றி காட்சிகள் என்பதால் படத்தில் பெரிய அளவில் சொல்லக்கூடிய கதாபாத்திரங்கள் குறைவே.ஆனால், அனைவரும் நன்றாக நடித்துள்ளனர்.

இப்பொழுதெல்லாம் திரைப்படங்களில் வில்லனும் அவரது ஆட்களும் நகைச்சுவை உணர்வுகளோடு நடந்துக்கொள்வது வழக்கமாகி விட்டது.ஆனால், இதனை 50 ஆண்டுகளுக்கு முன்பே, என்னதான் கதை வேகம் குறையாது சீரியஸாக நகர்ந்தாலும், சில சில நகைச்சுவை ஐட்டங்களை காட்சிகள் நடுவே மேலோட்டமாக கலந்து பார்ப்பவர்களின் கவனத்தை இன்னும் ஈர்த்திருப்பது அகிராவின் ஸ்டைல்.கொஞ்சம் கூட இரக்கமும் பரிதாபமும் இல்லாத வில்லன் கூட்டங்களில் இந்த நகைச்சுவையை எப்படி பயன்படுத்தினாலும் தப்பாகிவிடும்:கான்செப்ட் குலைந்துவிடும் : ரசிகர்களின் கோனத்க்தை மாற்றிவிடும்.அதை நன்கு உணர்ந்து சாமர்த்தியமாக கையாண்ட திரைக்கதை ஆசிரியர்களான Akira Kurosawa மற்றும் Ryuzo Kikushima-வை பாராட்டியே ஆகவேண்டும்.படத்தில் நகைச்சுவைக்கு முதன்மையாக Daisuke Kat-  வை கையாண்டு இருக்கின்றனர்.குண்டு உடலுடன் பேக்குத்தனமான ஈனோகுச்சி என்பவராக வருகிறார்.அவர் பார்வையும் உடல் மொழியும் பெருமளவில் ரசிக்கவைக்கிறது.         

பல நல்ல காட்சிகள் படம் முழுவதும்..

ஒரு கும்பலில் மூன்று பேரை நறுக்கி தன்னுடைய வீரத்தை காட்டி, இன்னொரு எதிரி கும்பலில் வேலைக்கு சேர்வதும்.ஒரு பலசாளி வந்த தைரியத்தில் அந்த கும்பலுடன் சண்டை இட ஏற்பாடுகள் செய்ய இந்த கும்பலில் மட்டுமல்ல நான் எந்த கும்பலின் ஆளும் இல்லை என்றும் கூறிவிட்டு மேலே உயரமாக இருக்கும் இடத்தில் அமர்ந்து, சண்டை என்று சொல்லிவிட்டு இந்த இரண்டு கும்பல்களும் செய்யும் சேஷ்ட்டிகளை நகைச்சுவையோடு படமாக்கி இருக்கின்றனர்.

சில நேரங்களில் "இந்த ஆளுக்கு ஏன் இந்த வம்பு, பேசாம வந்தோமா போனோமா என்று இல்லாமல் கொடியவன அழிக்கிறேன், மக்களை காப்பாற்றுகிறேன் என்று இருக்கிறானே" என்று மனதுக்குள் சில வார்த்தைகள் வந்தன.அதுவும் ஒரு தாயையும் அவரது குழந்தை மற்றும் கணவரோடு சேர்த்துவிட்டு கூடவே வில்லனிடம் அடிவாங்கும்போது தேவையா ? இது என்று நினைத்தேன்..காரணம் அந்த சாமுராய் இவை அனைத்தும் செய்ய வேண்டிய கட்டாயமும் இல்லை

நடிப்பு, இயக்கம், திரைக்கதை போன்றவைகளுக்கு பிறகு படத்துக்கு மிக பெரிய துணையாக வலு சேர்ப்பது ஒளிப்பதிவும் இசைதான்.கருப்பு வெள்ளையில் படம்.அதுவும் சாமுராய் படம்.சாமுராய் படங்கள் சினிமா உலகுக்கு புதிதும் இல்லை.அதை எவ்வளவு அழகாக மேலும் சிறப்பை கூட்டி காட்ட முடியுமோ அந்த அளவுக்கு கச்சிதமாக இருக்கிறது Kazuo Miyagawa மற்றும் Takao Saito - வின் கேமரா அசைவுகள்.குறிப்பாக சண்டை காட்சிகளில், அதுவும் கிளைமக்ஸில் காற்று பறக்க சாஞ்சூரோவும் பகைவர்களும் போடும் வால் சண்டை அற்புதமாக இருக்கும்.அதோடு, இன்னும் ஒரு காட்சியை சொல்லியே ஆக வேண்டும்.

கிளைமக்ஸில் கோஞ்சி (Eijirō Tōno) தூக்கில் தொங்கவிட்டதுப்போல் கீழே இருந்து கேமரா மேல் நோக்கி வர, அந்த ஒரே ஃப்ரேமில் மட்டும் கிளோஸ் அப்பில்  கோஞ்சியின் முகம், பாதி தூரத்தில் வில்லன் கூட்டம் அங்கிருந்து நீண்ட தூரத்தில் லோங் ஷாட்டாக சாஞ்சூரோ நிற்பதாக அது அமைக்கப்பட்டிருக்கும்./அந்த காட்சி முழுவதையும் என்னால் வார்த்தைகளால் கூற இயலாவிட்டாலும், படத்தில் சிறப்பாக கவர்ந்த ஒன்று.அடுத்து இசை, அந்த டீம் இசை ஒரு விதமான மகிழ்ச்சியை அளிக்கிறது.புதுமையாகவும் இருந்தது.அந்த மகிழ்ச்சிக்கு காரணமான இருந்த Masaru Sato-க்கு என் நன்றிகளை சொல்ல வேண்டும்.பொதுவாக வெஸ்டர்ன் திரைப்படங்களில் ஒரு விதமான கலாச்சார அமைப்பு இருக்கும்.காய்ந்து வரண்டு போன நிலப்பரப்புகள், மலைத்தொடர்கள், வரிசையான வீடுகள், எண்ணெய் வைக்காத தலைமுடி, அழுக்கு சட்டை, சோள உணவு என்று பலதரப்பட்ட அம்சங்கள் கலந்திருக்கும்.

இது பெரும்பாலும் பழைய அமெரிக்க வெஸ்டர்ன் படங்களின் வழி வந்தவையே.ஹீரோ ஊர் மக்களை காப்பாற்றுவது, தங்க புதையல்களை தேடிச்செல்வது என்று ஒரே மாதிரியான கதைகள் பல படங்களில் எடுக்கப்பட்டிருக்கும்..இதை மையமாக கொண்டே சில மாற்றங்களுடன் ஜப்பானிய கலாச்சாரத்தை உள்ளடக்கி இந்த படம் எடுக்கப்பட்டுள்ளது.தொடக்க காலத்தில் அதாவது 1940, 1950 ஆம் ஆண்டுகளில் ஹாலிவுட்டில் எடுக்கப்பட்ட பல கௌபாய் படங்களின் தாக்கங்கள் இதிலும் வழிந்தோடுகின்றன.இதனை பின்னர் இயக்குனர் அகிராவே சில இடங்களில் சொன்னதாக தெரிகிறது.

எ ஃபிஸ்ட்ஃபுல் டாலர்ஸ் படம் எப்படி யோஜிம்போவின் தழுவல் என்ற குற்றச்சாட்டு இருக்கின்றதோ அதே போல் யோஜிம்போ பழைய அமெரிக்க வெஸ்டர்ன் படங்கள், கதைகளின் தழுவல் என்றுக்கூட ஒரு குற்றச்சாட்டு நிலவுகிறது..இதில் கவனம் கொள்ள வேண்டிய ஒன்று Red Harvest / ரெட் ஹார்வெஸ்ட் என்ற நாவல்தான்.Dashiell Hammett. என்ற பிரபல கிரைம் எழுத்தாளரின் கைவண்ணத்தில் 1929-ஆம் ஆண்டு வெளிவந்த இப்புதினம், யொஜிம்போவின் கதையம்சத்தை அப்படியே கொண்டுள்ளது குறிப்பிடதக்கதாகும் (நாவலை இப்பொழுதுதான் படிக்க ஆரம்பித்தேன்).அதோடு, இதே எழுத்தாளரின் திரைக்கதை அமைப்பில் வந்த தெ கிளாஸ் கீய் படம், 1942-ஆண்டு Stuart Heisler இயக்கத்தில் வெளிவந்தது.இந்த படத்தின் சில காட்சிகளும் யோஜிம்போ படத்தோடு ஒன்றியே போகின்றது.குறிப்பாக, சாஞ்சூரோவை வில்லன் கூட்டம் பிடித்து அடித்து துன்புறுத்தும் காட்சி.அச்சு அசலாக அப்படியே காப்பி செய்யப்பட்டுள்ளதாம்.

உண்மையில் ஒரு படைப்பின் உந்துதலில் உருவாகுவதே இன்னொரு படைப்பு.ஒரு விதத்தில் ரெட் ஹார்வெஸ்ட் என்ற நாவலையும், கிளாஸ் கீய் என்ற படத்தையும் பலரும் ஞாபகத்தில் வைத்திருப்பதே சர்வ தேச சினிமாவில் கொண்டாடப்படும் யோஜிம்போவினால்தான்.அதற்கு அடியேனே மிக பெரிய உதாரணம்..இது பலருக்கும் பொருந்தும் என்றே நினைக்கிறேன்.

தொடர்ந்து தயாரிக்கப்பட்ட பல ஹாலிவுட், உலக படைப்புகளுக்கும் யோஜிம்போ திரைப்படம், கதை, கதாபாத்திர அமைப்பு, காட்சி வடிவங்கள் என்று ஒரு சிறந்த முன்னோடியாக, வழிக்காட்டியாகவே  விளங்கி வருகிறது. இதற்கு உதாரணமாக A Fistful Of Dollars (1964), Last Standing Man (1996), The Warrior and the Sorceress (1984), Lucky Number Slevin, Sukiyaki Western Django போன்ற படங்களை தாராளமாக கூறலாம்..இறுதியாக யோஜிம்போ ஒரு அற்புதமான திரைப்படம் என்பதில் சந்தேகமே இல்லை.பல வெஸ்டர் படங்களின் மீது ஆர்வங்கள் நிறைந்தவர்கள், சினிமாவை தீவிரமாக மதிப்பவர்கள், நல்ல அறிமுகத்தை விரும்புவர்கள் அனைவரும் பார்க்க வேண்டிய ஒரு படைப்பு.அகிரா குரோசாவா என்ற இயக்குனரை பற்றி தெரியாதவர்கள் முதலில் இந்த படத்தில் இருந்தும் தொடங்கலாம்.

மீண்டும் அடுத்த பதிவில் சந்திக்கலாம்..அதுவரை நன்றி மற்றும் வணக்கம்.உங்கள் ஆதரோவோடு,